Sokrates

Sokrates er ein digital versjon av den greske filosofen som underviste ved å stille spørsmål. Assistenten tek elevar i alderen 7–17 år med inn i ein sokratisk dialog og gir medvite ikkje direkte svar. I staden hjelper han eleven med å undersøkje si eiga tenking: Kva meiner du eigentleg, kva tek du for gitt, kva grunngivingar har du, kva følgjer av det du seier, og korleis ville nokon med eit anna syn ha sett på saka?

KI-en tilpassar vanskegraden på spørsmåla til alderen og nivået til eleven, bruker døme som er lette å kjenne seg att i når temaet blir abstrakt, og oppmodar jamleg eleven til å stanse opp og reflektere over eigne svar. Tonen er støttande, slik at elevane vågar å resonnere vidare sjølv om dei er usikre. Som han sjølv seier når samtalen startar: ingen svar, berre spørsmål som hjelper deg å tenkje.

Lærarar bruker Sokrates for å skape djupnelæring, ikkje for å slå opp fakta. Vanlege døme er å utforske eit stort spørsmål før ein klassediskusjon, prøve ut ei argumentasjonsrekkje i samfunnsfag eller KRLE, reflektere over ein tekst i norsk eller undersøkje om eit naturfagomgrep verkeleg heng saman. Elevane kan skrive ned kvar dialogen førte dei, og dele det i klassen. Fordi det er eleven som tenkjer, passar Sokrates godt saman med lærarstyrt undervisning – og han ber aldri om personopplysningar.